പറവൂർ: വൈദ്യുതി ബന്ധം നിലച്ചാൽ പറവൂർ സബ് ട്രഷറിയിൽ ഇടപാടുകൾക്കെത്തുന്നവർ ഉറപ്പായും വലയും. പെൻഷൻ വാങ്ങാനെത്തുന്ന വയോധികർ ഉൾപ്പടെയാണ് ഇവിടെ അധികൃതരുടെ അനാസ്ഥയിൽ നട്ടംതിരിയുന്നത്.
ഇന്നലെ ഉച്ചകഴിഞ്ഞ് 2.25ന് വൈദ്യുതി നിലച്ചതോടെ ഇവിടെ ഇടപാടുകാർക്ക് മണിക്കൂറുകൾ കാത്തിരിക്കേണ്ടിവന്നു. മുന്പ് വൈദ്യുതി തകരാറിലും ഇൻവെർട്ടർ സൗകര്യമുണ്ടായിരുന്നതിനാൽ ഇത് ഇടപാടുകാരെ ബാധിക്കില്ലായിരുന്നു.
കുറച്ച് ദിവസം മുമ്പ് ബാറ്ററിക്ക് കേടുപാട് ഉണ്ടായതോടെ ഇൻവെർട്ടർ പ്രവർത്തിക്കാതായി. ഇതോടെയാണ് മണിക്കൂറുകൾ കാത്തുനിൽക്കേണ്ട അവസ്ഥയുണ്ടായത്.ബാറ്ററിയുടെ തകരാർ പരിഹരിക്കാത്തത് പ്രതിഷേധത്തിന് ഇടയാക്കുന്നുണ്ട്.